Fanasgiettis, Deanus, leat máŋga čoađgekássa. Ovtta dain kássii leat bidjan kamera, vai beassá čuovvut mielde mii doppe dáhpáhuvvá. Dás oainnát mo čoađgekássa lea oaidnit.
28.05.2025
Dál lea lállin áigi álgán ollásit. Čoađgi lea dál beassan 28 tiimmu lállit ráfis. Eai leat šat eará čoađggit bahkken kássii.
26.05.2025
Dál lea čoađgi álgán dávjjit lállit. Dál lea maŋimiš beivviid boahtán eahkedis jađe lállá sullii 10-12 tiimmu. Doaivumis čivget sullii njeallje váhku geahčen jos buot manná nugo galgá
Dás vuolábealde oainnát muhtin dáhpáhusa čoađgekássas dássážii. Maŋimuš dáhpáhusat leat bajimuččas.
Miessemánu 28 beaivve.
Čoađgi gokčá maniid bures ovdal go guođđá beasi.
Miessemánu 26 beaivve.
Leamaš mearehis olu manit čoađgekássas dán jagi. Beasi hoavda lálii 12 tiimmu, ja dan botta fitne njeallje eará čoađggi mannemin. Maŋŋá go beasi hoavda guđii kássa, de finai vel okta mannemin. Kássas leamaš oktiibuot 27 mani, muhto leat dađistaga čoaggán vai jo lállá.
Miessemánu 25 beaivve.
Čoađgi várjaleamen iežas beasi vai vierrásat eai beasa sisa.
Miessemánu 25 beaivve.
Gal dat lea bivnnut dát čoađgekássa. Fas bahkkii eará čoađgi.
Miessemánu 25 beaivve.
Čoađgi gaská uvjjaid vai manit bissot buoret liekkasin. Muhto de bahkke fas eará čoađgi kássii.
Miessemánu 25 beaivve.
Čoađgi sirddaša ja joraha maniid. Dan bargá jáhkkimis vai maniin lea seammá temperatuvra ja dalle čivggat čivget oktanaga.
Miessemánu 24 beaivve.
Fas menddo ollu manit. Álggii šaddat váttis lállit. Orru nu ahte leat njeallje iešguđet čoađggi mat johtet kássas ja mannejit. Ledje 16 mani.
Miessemánu 24 beaivve.
Ferte maiddái čorget.
Miessemánu 22 beaivve.
Jos šaddet menddo ollu manit, dalle čoađgi ii lále. Deike báhce 9 mani, ja moadde tiimmu maŋŋá ledje velá guokte mani ihtán.
– Vihtta jagi áigge ii lállán oktage čoađgi. Dalle ledje 18 mani kássas. Das maŋŋá leat čoaggán maniid nu ahte báhcet sullii 10-12 mani velá kássii.
Miessemánu 21 beaivve.
Lei jo lállán sullii 6 tiimmu, jađe bođii muhtin eará. Dalle gal suhtai. Muhto ii lean ávki. Nubbi mannii ja manai fas.
Miessemánu 19 beaivve.
Čoađgekássa lea hui bivnnut. Muhtimin de leat guovttis oktanaga beasis mannemin.
Miessemánu 18 beaivve.
Vuosttaš čoađgi mii mannii. Lea go son dát vel eará čoađgi? Dát lei badjelaš tiimmu beasis ovdal go girdilii.
Miessemánu 17 beaivve.
Nubbi čoađgi bođii 15 minuvtta maŋŋá. Sáhttá earuhit njiŋŋálas čođggiid čoađggi njunnegežiin. Dát lei fas beasis sullii 15 minuvtta.
Miessemánu 17 beaivve 2025.
Čoađgi fitná dutkamin beasi. Orru go son dohkálaš? Lei doppe sullii 10 minuvtta.
