Mii lea dappal, goatnil, savu, njavvi?

Otne hárve gávnnat sámegielat nuora gii diehtá maid dappal, goatnil, njavvi, ráppaš ja savu mearkkašit. Vierrun lea šaddan geavahit okta geardánis dárogiel sániid háladettiin dahje humadettiin sámegiela luossabivdoáššiid birra. Dat čuohcá unohasat olbmo bealljái gii máhttá dán giela. 

Savu, savvon. Savvonis lea buorre sugadit ja okkodit. Govva: Mihkku Solbakk.

Savu, savvon lea hui guhkes oassi jogas dahje (d)eanus, mas dadjat ii leat rávdnji. Savvonis lea buorre sugadit ja okkodit. 

Savvona vulobealde lea dávjá guoika, rávdnjás oassi jogas, gos lea maiddái buorre oaggut. Guoikkas leat dábálaččat buorit oaggungovit ja -dabbalat.

Dappal lea stuorát, viiddis gohpi, mii maiddái sáhttá leat geavgŋás. Geavgŋás lea viiddis gohpi man namma lea Leađudappal

Geavŋŋis

Geavŋŋis lea stuorra, rávdnjás guoika. Geavŋŋis, mii lea maiddái báikenamma Deanus, lea buorre oaggun- dahje šlivgunbáiki, gosa geassit čoahkkanit ollu turisttat šlivgut.

Guorvil. Govva: Mihkku Solbakk.

Go luoitila fatnasiin guikii, de ferte váruhit guorvila, mii lea guoikkas gahčahat, vai fanas ii gopmán. 

Ráppaš - ráppas. Govva: Mihkku Solbakk.

Guoikkas leat geađggit, maid vulobealde lea dávjá jorrirávdnji. Dat gohčo duvvo ráppasin dahje ráppašin.

Njallavárnjavvi. Govva: Mihkku Solbakk.

Unna guoikkaš, mas lea veaháš rávdnji, gohčoduvvo gis njavvin. Njallavárnjavvi vulobealde Hillágura lea beakkán oaggunsadji.

Dasttán njavi vulobealde lea goatnil. Goatnil lea viiddis oassi jogas, ja ii leat rávdnjái.

Nuohttegoatnil. Govva: Mihkku Solbakk.
Gohpi Geavgŋás man namma lea Ruksesgeađgi. Govva: Mihkku Solbakk.