Govva: Nordlys Drone. Girjjis Deanučázádat – Tanavassdraget.

Muitalusat juohkásit máŋgga suorgái. Muhtun muitalusat leat eanáš áigegolu várás, dat sulastahttet máidnasiid, vaikko muitalus vuođustis lea duohta ja jáhkehahtti. Okta suorgi gohčoduvvo čilgehusmuitalussan, nammalassii dakkár muitalusat mat čilgejit manin áššit leat nugo leat, dan dihtii go oktii áiggis dáhpáhuvai juoidá mii lea čilgehussan dasa. Dakkár muitalusat leat hui dábálaččat buot álbmogiid gaskkas. Muhtumin dat gohčoduvvojit sivdnádusmuitalussan dahje -myhtan, muhto eará háviid dat leat dušše álbmotmuitalusat. Iešguđet ge álbmogiid muitalusaid buohtastahttin lea hui miellagiddevaš bargu dan dihtii go das ihtá álbmogiid jurddašeapmi ja sin iešádden.

            Čilgehusmuitalusat sáhttet leat dan birra ahte manin muhtun báikkis lea dat namma mii lea, manin omd. buoidagis lea čáhppes seaibegeahči, manin guovža beassá oađđit olles dálvvi, ja manin njoammil ii goassige gártta hukset alcces dan goađi maid juohke dálvvi lohpida dahkat, ja dievva eará muitalusat.

            Muhtun miellagiddevaš Deatnogátti muitalus čilge manin Deanus lea ovtta guoikka namma Sieiddáguoika ja vuolit njavi namma gis Sáidenjavvi. Báikenamma Sieiddá boahtá sieide-sánis, sámi ovddeš oaffarbáiki. Sieiddá birra leat golbma sieiddi – okta goappat bealde Deanu ja goalmmát aiddo Sieiddáguoikka buohta. Oktiibuot dat golbma sieiddi dahkat golmmačiegaga, ja dan dihtii go dat lea erenoamáš bassi guovlu, de gávdnojit doppe sihke Sieiddájohka, Sieiddasuolu, Sieiddaguoika ja báiki Sieiddá goappat bealde Deanu.

            Guoikka ja njavi erohus lea ahte guoikkas lea olu johtilebbo čáhcejohtu go njavis, vaikko goappašagain lea garra rávdnji. Dat lea dán muitalusas dehálaš duogášdiehtu, go oainnat oktii dolin – dan áiggi go guolit ja eallit ain máhtte hállat – dolkkai sáidi das go dušše luossa beassá gorgŋet Detnui, ii ge sáidi dahje dorski. Luossa han lea sihke sáiva- ja sáltečáhceguolli mii birge guktuid čáziin. Sáidi dasto mearridii ahte son dat gal čájeha lussii ahte son ge veadjá vuodjat vuosterávdnjái. Dát dáhpáhuvai giđđageasi aiddo go luossa lei johtimin fas merrii maŋŋil go leamaš dálvvi jogas. Dalle ii šat gohčoduvvo luossa-namahusa mielde, muhto navdojuvvo vuorrun danin go lea buot ruoidnan, gollan ja nohkan, ii ge dohkke oppa olbmoborramuššan ge.

Sáidenjavis deaivá luossa sáiddi gii lea jođus bajás Deanu. Luossa buot hirpmástuvvá ja jearrá sáiddis ahte maid árpmuid bat don leat dádjumin go leat deike vuolgán, don han it gula sáivačáhcái. Sáidi vástida ahte son dat gal áigu čájehit lussii ahte son ge vissa birge Deanus. Lasiha vel ahte mus lea seammá ollu buoidi vuoivasis go dus. Luossa ii vuollán neavvumis sáideriebu ja dadjá: Muhto don han ieš dieđát man jorbbas ja šođbat mun lean mearas, ja man olu gievrrat mun lean go don, ja geahča mu dál; buot de lean gollan ja nohkan. Ále jo eisige don dieinna hámiin oppa geahččal ge duon guikii beassat, bargga duotna jorgalit das ja máhccat merrii farggamus lági mielde!

            Sáidi jeagadii luosa, ja jorggihii aiddo dan njavis mii lea Sieiddáguoikka vulobealde, de dan dihtii lea otná dan beaivvi guoikka namma Sieiddáguoika ja njavi namma gis Sáidenjavvi, juste dan dihtii go sáidi das jorggihii ja máhcai fas merrii.Sáidenjavis deaivá luossa sáiddi gii lea jođus bajás Deanu. Luossa buot hirpmástuvvá ja jearrá sáiddis ahte maid árpmuid bat don leat dádjumin go leat deike vuolgán, don han it gula sáivačáhcái. Sáidi vástida ahte son dat gal áigu čájehit lussii ahte son ge vissa birge Deanus. Lasiha vel ahte mus lea seammá ollu buoidi vuoivasis go dus. Luossa ii vuollán neavvumis sáideriebu ja dadjá: Muhto don han ieš dieđát man jorbbas ja šođbat mun lean mearas, ja man olu gievrrat mun lean go don, ja geahča mu dál; buot de lean gollan ja nohkan. Ále jo eisige don dieinna hámiin oppa geahččal ge duon guikii beassat, bargga duotna jorgalit das ja máhccat merrii farggamus lági mielde!

            Sáidi jeagadii luosa, ja jorggihii aiddo dan njavis mii lea Sieiddáguoikka vulobealde, de dan dihtii lea otná dan beaivvi guoikka namma Sieiddáguoika ja njavi namma gis Sáidenjavvi, juste dan dihtii go sáidi das jorggihii ja máhcai fas merrii.